Kreu i OSBE-ODIHR-it, Lamberto Zannier, ka vizituar një prej qendrave të votimit për të parë nga afër procesin ku shqiptarët po votojnë për të zgjedhur përfaqësuesit për Parlamentin e ri.
Duke folur për mediet, Zannier tha se vëzhguesit janë në Shqipëri për të parë nëse zgjedhjet do të realizohen sipas standardeve ndërkombëtare.
“Ne jemi këtu për të vëzhguar procesin zgjedhor dhe për të vëzhguar që këto zgjedhje nëse janë në përputhje me standardet ndërkombëtare dhe me angazhimet e Shqipërisë drejt Bashkimit Evropian. Kjo është një nga qendrat e votimit nga qendrat e shumta ku ne kemi prezencën ditën e sotme. Ne si OSBE-ODIHR ne kemi 240 vëzhgues por gjithashtu janë 135 të tjerë që janë nga vendet anëtare të OSBE-së dhe nga Parlamenti Europian”, u shpreh Zannier.
Zyrtari i OSBE-ODIHR njoftoi se ditën e nesërme do të mbajë një konferencë për të prezantuar gjetjet e para nga zgjedhjet parlamentare.
“Dita e zgjedhjeve është dita e dukshme e vëzhgimit por ne jemi këtu që nga fundi i marsit dhe sigurisht kemi vëzhguar fushatën zgjedhore dhe sot është pika e fundit. Nesër do të kemi një konferencë për mediet, në orën 15:00. Jam duke mbledhur informacion dhe kam ardhur në këtë qendër votimit sepse është një nga angazhimet e Shqipërisë që 10 për qind e votimit të jetë elektronik. Një pjesë e vlerësimit tonë do të jenë edhe procedurat e votimit elektronik. Po punojmë ngushtë me Komisioni Qendror të Zgjedhjeve dhe deri tani ky bashkëpunim është shumë transparent”, tha Zannier. Sa i përket fenomenit të shitblerjes së votës, Zannier tha se “po i ndjekim çështjet që janë vëzhguar më përpara dhe nesër do t’i paraqesim vëzhgimin tonë në raportin që do të bëjmë ditën e nesërme”, njofton rtsh.
