Mediat e mëdha ndërkombëtare po i bëjnë jehonë rikthimit në pushtet të Sali Berishës. Gazeta e njohur amerikane, ‘Washington Post’ shkruan se ekipi i Donald Trump po punon për kthimin në pushtet të Sali Berishës.“Disa nga arkitektët e fushatave presidenciale të Donald Trump janë ribashkuar në Shqipëri, ndërsa përpiqen të ndihmojnë një kandidat me stil “trumpist” të fitojë në zgjedhjet e fundjavës.
Në mesin e tyre janë Chris LaCivita, i cili shërbeu si bashkëmenaxher i fushatës së suksesshme të Trump në vitin 2024, anketuesi i vjetër i Trump, Tony Fabrizio, dhe Paul Manafort, i cili ishte drejtues i fushatës së Trump në vitin 2016 përpara se të dënohej në vitin 2018 për krime që përfshinin lobim të fshehtë për presidentin pro-rus të Ukrainës.
Treshja po punon për ish-kryeministrin dhe presidentin Sali Berisha, kreun e Partisë Demokratike të opozitës në Shqipëri, i cili po sfidon kryeministrin Edi Rama për të rikthyer demokratët në pushtet, edhe pse ai pret gjyqin për akuza për korrupsion,” shkruan gazeta.
“Është e vetmja Parti Demokratike për të cilën do të merrja parasysh të punoja ndonjëherë,” tha me shaka LaCivita.
“Gjatë gjithë fushatës, Berisha e ka paraqitur veten si një figurë në stilin e Trump-it dhe si viktimë e një komploti politikisht të motivuar, për të cilin fajëson pjesërisht miliarderin amerikan George Soros — mbështetës i kauzave liberale në mbarë botën dhe kundërshtar i vjetër i konservatorëve.
Ai nisi fushatën e tij me premtimin për të “Bërë Shqipërinë të Madhe Përsëri”, por më pas u detyrua të ndryshojë sloganin për shkak të shqetësimeve se mund të keqinterpretohej si një referencë ndaj “Shqipërisë së Madhe”, dhe të shkaktonte përplasje në Ballkanin Perëndimor për shkak të frikës që ekziston në disa vende fqinje lidhur me ekspansionizmin shqiptar.
Fushata tani premton ta bëjë Shqipërinë “madhështore”: në vend të “të madhe”.
Ashtu si Trump, Berisha ka edhe një kapele karakteristike për fushatën — një kapele blu që ka të shtypur numrin 1, renditja e Demokratëve në fletën e votimit,” thekson media amerikane.
Partia e Berishës e paraqet angazhimin e stafit të fushatës së Trump-it si një arritje të madhe. Amerikanët, sipas tyre, kanë punuar në të gjitha aspektet e fushatës, nga strategjia te mesazhet dhe komunikimi me publikun.
“LaCivita menaxhoi një nga fushatat më spektakolare në historinë politike, duke e bërë president një politikan që i kishte të gjithë kundër: kompanitë mediatike, sondazhet, OJQ-të, etj., në një masë të caktuar njësoj si situata me opozitën dhe liderin e saj këtu në Shqipëri,” thuhej në një përgjigje me shkrim nga partia për pyetjet e Associated Press.
Partia Demokratike e Shqipërisë dhe Republikanët amerikanë janë “aleatë natyralë”, shtuan ata, pasi të dyja janë “kundër kulturës ‘woke’ dhe mbështesin familjen dhe tregun e lirë”./BS
