Në një moment vendimtar për sezonin e Barcelonës, ku “El Clasico” i fundjavës ndaj Real Madridit mund të përcaktojë fatin e titullit, lajme shqetësuese vijnë nga Katalonja: tre ndeshjet e fundit të blaugranave rrezikojnë të mos transmetohen në televizion.
Punonjësit e kompanisë Mediapro, e cila zotëron të drejtat televizive për La Liga-n, kanë paralajmëruar një grevë trejavore, që përkon pikërisht me fundin e kampionatit. Ndeshjet që mund të preken janë derbi ndaj Espanyol, sfida në shtëpi kundër Villarrealit dhe transferta ndaj Athletic Bilbaos – të gjitha me rëndësi të madhe për fatin e kampionatit dhe për mundësinë e Barcelonës për të shpallur titullin.
Nëse greva konfirmohet, miliona tifozë katalanas mund të mbeten pa mundësi për ta ndjekur drejtpërdrejt nga ekrani festën e mundshme të titullit, në një sezon të vështirë dhe të rëndësishëm për klubin.
Punonjësit e Mediapro kërkojnë ndërprerjen e përdorimit të kontratave të përkohshme dhe kalimin në marrëdhënie pune të përhershme. Gjithashtu, ata kërkojnë njohjen e plotë të vjetërsisë në punë, një çështje që ka shkaktuar tensione të vazhdueshme me drejtuesit e kompanisë./KJ
