Kriza mes Mbretit Charles dhe Princit Harry po thellohet, me burime pranë pallatit që raportojnë për irritim dhe zhgënjim të monarkut ndaj të birit. Shkak është bërë reagimi i Harry-t ndaj vendimit për t’i hequr sigurinë shtetërore, të cilin ai e cilësoi si “të pamatur”.
Sipas “The Sun”, Mbreti Charles është i zemëruar me të birin, i cili e ka përdorur çështjen e sigurisë për të akuzuar indirekt babanë se nuk kujdeset për familjen e tij. Burime pranë mbretit theksojnë se Charles është i lënduar nga sugjerimi se ai duhet të ndërhyjë në një vendim që i përket qeverisë dhe gjykatave, duke thënë se çdo përfshirje nga ana e tij do të ishte “kushtetutërisht e papërshtatshme”.
Harry, nga ana tjetër, ka deklaruar se nuk kërkon që babai të ndërhyjë, por që çështja të trajtohet me objektivitet nga autoritetet. “Nuk e di sa jetë i ka mbetur babait tim,” tha ai në një intervistë të fundit, duke nënvizuar se nuk dëshiron ta vazhdojë më këtë betejë ligjore.
Ai akuzoi gjithashtu komitetin Ravec – organi që vendos për sigurinë e figurave mbretërore – për “shpërdorim detyre”, duke pretenduar se nuk ka bërë vlerësime të rrezikut dhe ka vënë në rrezik jetën e tij dhe të familjes. Harry tha se do t’i dërgojë një letër Ministres së Brendshme për ta kërkuar një rishikim urgjent të procedurës. “E dua vendin tim, gjithmonë e kam dashur… dhe është e trishtueshme që fëmijët e mi nuk do të mund ta njohin atë,” përfundoi Harry, ndërsa marrëdhëniet me familjen mbretërore mbeten më të ftohta se kurrë./TCH
