Zënka mes disa personave ka agravura me të shtëna armësh të shtunën pasdite në Brugg AG, Zvicër.
Kjo ka bërë që një person shqiptar nga Kosova të mbetet i plagosur.
Sipas policisë kantonale të Aargaut, disa të shtëna u shkrepën nga një BMW në drejtim të një makine Skoda në një parking.
Brenda Skodës ndodheshin dy persona, ku njëri prej tyre, një kosovar 31-vjeçar, mbeti i plagosur dhe u dërgua në Spitalin Kantonal të Badenit.
Zona përreth vendngjarjes u rrethua dhe mbeti nën mbikëqyrje të rreptë policore.
Në të njëjtën kohë, situatë e tensionuar u raportua edhe në Spitalin Kantonal të Badenit, ku dhoma e urgjencës ruhej nga policia.
Sipas Blick.ch, kjo masë sigurie u mor pasi viktima e të shtënave në Brugg ishte pranuar në spital me plagë nga armë zjarri. Sipas autoriteteve, një 24-vjeçar zviceran është identifikuar si i dyshuar kryesor.
Ai, bashkë me një tjetër shtetas nga Kosova, u ndaluan nga policia më vonë të shtunën dhe u arrestuan përkohësisht.
Policia nuk ka bërë të ditur moshën e të dyshuarit të dytë, as nëse të dy ndodheshin brenda BMW-së nga ku u qëllua.
Prokuroria ka hapur një procedurë penale, ndërsa hetimet për zbardhjen e rrjedhës së saktë të ngjarjes dhe lidhjes së mundshme të incidenteve të tjera me këtë rast janë në zhvillim, njofton telegrafi.
