Një enzimë e re është identifikuar si armë potenciale për të luftuar glioblastomën, formën më agresive dhe vdekjeprurëse të tumorit në tru.
Zbulimi është bërë nga një grup studiuesish të Qendrës Onkologjike të Universitetit Shtetëror të Ohajos në SHBA dhe është publikuar në revistën shkencore “Science Advances”. Glioblastoma është një tumor që zhvillohet me shpejtësi nga qelizat gliale të trurit dhe prek rreth 15 mijë persona çdo vit.
“Është tumori më vdekjeprurës i trurit, me një mbijetesë mesatare prej vetëm 12-16 muajsh pas diagnostikimit, pavarësisht trajtimeve aktuale”, shpjegon Huali Su, autori kryesor i studimit.
Shkencëtarët kanë identifikuar enzimën “Pgm3” si kyçe në procesin që ndihmon tumorin të rritet.
Kjo enzimë është përfshirë në prodhimin e një molekule që bashkon sheqernat me proteinat dhe yndyrnat, duke i dhënë tumorit energji dhe mundësi për t’u përhapur. Bllokimi i kësaj enzime mund të ndërpresë lidhjen mes sheqernave, proteinave dhe yndyrnave brenda qelizave, duke ndaluar rritjen e tumorit”, tha Deliang Guo, koordinatori i studimit. Zbulimi hap rrugën për zhvillimin e trajtimeve të reja, në një kohë kur opsionet për glioblastomën janë ende të kufizuara, njofton oranews.
