Millennium Challenge Corporation (Korporata e Sfidës së Mijëvjeçarit – MCC)– një agjenci ndihme ndërkombëtare që bashkëpunon me mbi katër dhjetë shtete në zhvillim për të promovuar rritjen ekonomike – po mbyllet nga Departamenti i Efikasitetit të Qeverisë, sipas një e-maili të dërguar të martën për punonjësit dhe të marrë nga POLITICO.
“Ne kuptojmë nga ekipi i DOGE se shumë shpejt do të ketë një reduktim të konsiderueshëm në numrin e projekteve të MCC-së dhe për pasojë edhe të stafit të agjencisë”, shkruante CEO i përkohshëm në e-mail.
E krijuar nga Kongresi në vitin 2004 gjatë administratës George W. Bush, MCC ka pasur mbështetje bipartizane për vite me radhë dhe është renditur nga grupi i transparencës së ndihmës Publish What You Fund si agjencia bilaterale më transparente në botë. MCC, që është e pavarur nga Departamenti i Shtetit, aktualisht ka mbi 5.4 miliardë dollarë në grante aktive në 20 shtete me të ardhura të ulëta që janë ose nënshkruar ose janë duke u implementuar. Synimi i DOGE për këtë agjenci bipartizane i shtohet sulmeve të administratës Trump ndaj grupeve të ndihmës ndërkombëtare.
Agjencia, që ka më shumë se 320 punonjës, do t’i ofrojë punonjësve mundësinë e pensioneve të parakohshme vullnetarë dhe një programi të dorëheqjes të shtyrë për ata që janë të kualifikuar, sipas emailit. Ata që janë të interesuar për këtë mundësi u kërkohet të dërgojnë një e-mail me titullin “Kërkesë për t’u regjistruar: [DRP/VERA]” deri në fund të ditës më 29 prill. Disa punonjës mund të vendosen gjithashtu në pushim administrativ që nga 5 maji, por koha e saktë është e pasqaruar, sipas e-mailit.
Në një takim me të gjithë stafin që u mbajt të mërkurën në mëngjes, drejtuesit u thanë punonjësve se DOGE do të hartojë një rezolutë që javën e ardhshme për bordin e agjencisë – i cili përbëhet nga Sekretari i Shtetit Marco Rubio, Sekretari i Thesarit Scott Bessent, Dërguari i Posaçëm për Tregtinë Jamieson Greer, CEO i përkohshëm dhe katër anëtarë të sektorit privat – për të përfunduar grantet në mbarë botën brenda muajve të ardhshëm, sipas një pjesëmarrësi që u dha anonimitet për të diskutuar mbi takimet e brendshme. (Emri i CEO-së të përkohshëm nuk u përfshi në screenshot-in e emailit që POLITICO shqyrtoi.)
Një punonjës, që u dha anonimitet për shkak të frikës nga hakmarrja, tha se pritshmëria është që brenda 90 ditësh, të gjitha operacionet e MCC-së do të mbyllen.
“Agjencia jonë për më shumë se 10 vjet ka pasur audite të pastra, dhe arsyeja pse po mbyllemi, edhe sipas njerëzve nga DOGE, nuk ka të bëjë me faktin se agjencia jonë është e shpenzuar ose e korruptuar”, tha punonjësi, transmeton KosovaPress.
Në dhjetor, Senatori Jim Risch (R-Idaho) sponsorizoi dhe prezantoi një legjislacion në mbështetje të grupit, i cili do të kishte zgjeruar autoritetin e MCC-së për të bashkëpunuar me një gamë më të gjerë shtetesh.
Njoftimi për të gjithë stafin u bë pas një serie takimesh mes punonjësve të DOGE Justin Fox dhe Nate Cavanaugh dhe udhëheqësisë së lartë të MCC-së që ndodhën gjatë dy javëve të fundit.
Një përfaqësues i DOGE nuk u përgjigj një kërkese për koment, raporton POLITICO.
Mbyllja e afërt e MCC-së vjen gjithashtu pasi lideri i DOGE, Elon Musk, tha të martën se ditët e tij në agjenci do të përfundojnë së shpejti për shkak të raporteve të dobëta të të ardhurave të Tesla-s për tremujorin e parë. Por kjo tregon se DOGE nuk do të ngadalësojë domosdoshmërisht shkatërrimin e agjencive edhe pas tërheqjes së Musk.
MCC ka kërkuar përjashtime për disa shtete që kanë grante aktive, përfshirë Côte d’Ivoire, e cila ka kërkuar një periudhë katërmujore për mbylljen, dhe Mongolinë, Senegal dhe Nepal, të cilat kanë kërkuar periudha tre-mujore për mbylljen, sipas pjesëmarrësit të takimit.
“Ne gjithmonë jemi lavdëruar si modeli i agjencisë qeveritare që ishte efikase, efektive dhe transparente”, tha një punonjës i MCC-së. “Por, është e qartë se ndihma ndërkombëtare nuk është një prioritet për këtë administratë”.
Ish-kryeministri i Kosovës, Avdullah Hoti ka thënë se Kosova është ndër vendet që do pësojë më së shumti nga mbyllja e Korporatës së Sfidës së Mijëvjeçarit (MCC).
Ai ka thënë se refuzimi i Marrëveshjes së Uashingtonit të 4 shtatorit 2020 pamundësoi ndërtimin e termocentralin me gaz.
“Tani kur edhe MCC po mbyllet në kuadër të reformimit të Administratës Amerikane nga Presidenti Trump, Kosova do të humbë edhe shumën prej 220 milionë dollarëve për blerjen e baterive për ruajtje të energjisë. Bashkë me këto edhe shumë projekte të tjera të ndërlidhura që ndikojnë drejtpërdrejt në mirëqenien e qytetarëve”, ka shkruar Hoti në Facebook.
I më tej në reagimin e tij, ka thënë se “Kështu ndodh kur qeverisin bukëpërmbysurit, të cilët duke injoruar Marrëveshjen e Uashingtonit refuzuan partneritetin me SHBA – shtetin që është përgjegjësi kryesor për ekzistencën e Kosovës së lirë dhe të pavarur. Këta gjithashtu refuzuan të pezullojnë tarifat e importit për produktet amerikane. Kjo qeveri po punon kundër interesave tona strategjike”, njofton telegrafi.
