Në emër të popullit të Kosovës, presidentja shpreh urimet më të sinqerta për udhëheqjen shpirtërore të Papës në një kohë sfidash globale.
Presidentja Vjosa Osmani, ka uruar Papën e sapozgjedhur, Shenjtërinë e Tij Papa Leo XIV, me rastin e emërimit të tij në krye të Selisë së Shenjtë. Përmes një postimi zyrtar, Presidentja Osmani ka shprehur urimet më të sinqerta në emër të popullit të Republikës së Kosovës, duke vënë theksin në rëndësinë e udhëheqjes shpirtërore të Papës në një periudhë sfiduese për njerëzimin.
“Zëri i tij do të ketë peshë të madhe në një kohë kur bota dëshiron paqe, unitet dhe dhembshuri. Uroj që pontifikati i tij të karakterizohet nga qartësia morale, udhëheqja e palëkundur dhe përkushtimi i thellë ndaj dinjitetit të çdo njeriu,” ka shkruar Osmani.
Ajo ka theksuar gjithashtu rolin e rëndësishëm që Selia e Shenjtë ka pasur historikisht në promovimin e paqes dhe solidaritetit mes popujve, duke shprehur shpresën për thellimin e marrëdhënieve ndërmjet Republikës së Kosovës dhe Vatikanit.
Robert Francis Prevost nga Shtetet e Bashkuara të Amerikës është zgjedhur papa i 267-të në histori.
69-vjeçari nga Chicago është Papa i parë nga SHBA-ja. Ai do të njihet si Leo XIV.
Konsiderohet si lider me eksperiencë të madhe që ka kaluar të gjithë karrierën në Amerikën Latine dhe ka shërbyer në zyrën e Vatikanit.
Pritet të jetë vazhdues i reformave të nisura nga Papa Françesku./BS
