Agjenti portugez Jorge Mendes ka ndezur debatet në botën e futbollit me një deklaratë të fortë në lidhje me garën për Topin e Artë 2025. Sipas tij, askush tjetër nuk e meriton më shumë këtë çmim prestigjioz sesa Lamine Yamal, adoleshenti që ka shkëlqyer me fanellën e Barcelona-s gjatë këtij sezoni.
Yamal, vetëm 17 vjeç, ka pasur një sezon të jashtëzakonshëm, duke regjistruar 16 gola dhe 24 asiste në 52 ndeshje në të gjitha kompeticionet. Kontributi i tij ka qenë thelbësor për sukseset e skuadrës katalanase, që tashmë ka siguruar Kupën e Mbretit dhe Superkupën e Spanjës, ndërsa është shumë pranë edhe fitimit të La Liga-s. Pavarësisht kësaj, konkurenca është e fortë. Raphinha, shoku i tij i skuadrës, ka shënuar 34 gola dhe ka dhënë 25 asiste në 54 ndeshje, duke qenë po ashtu një nga liderët ofensivë të Barcelonës. Ndërkohë, Mohamed Salah ka udhëhequr Liverpoolin drejt titullit në Premier League, me një bilanc të jashtëzakonshëm prej 33 golash dhe 23 asistesh në 50 ndeshje.
Megjithatë, Mendes ka qenë i prerë në qëndrimin e tij, siç është cituar nga gazetari i njohur Fabrizio Romano: “Lamine Yamal meriton të fitojë Topin e Artë këtë vit. Ai ka qenë lojtari më i mirë në botë këtë sezon, kjo është shumë e qartë. Niveli i Lamine ka qenë i denjë për Topin e Artë.”./KJ
