Kryetari i qytetit të Kievit, Vitali Klitschko, ka falënderuar kryetarin e Lidhjes Demokratike të Kosovës (LDK), Lumir Abdixhiku, për përkrahjen e vazhdueshme që Kosova i ka dhënë Ukrainës që nga fillimi i agresionit rus.
Në takimin e zhvilluar në kuadër të punimeve të Kongresit të Partive Popullore Evropiane (EPP), që po mbahet në Spanjë, Abdixhiku ka shprehur mirënjohje për qëndrueshmërinë e popullit ukrainas dhe ka theksuar se Kosova, si një vend që ka kaluar një periudhë të ngjashme sfidash, e kupton rëndësinë e mbështetjes ndërkombëtare për një shtet të pavarur që lufton për sovranitetin e tij.
“Populli i Kosovës qëndron përkrah Ukrainës. E dimë mirë se çfarë do të thotë të mbrosh lirinë dhe shtetësinë në kushte të vështira. Mbështetja jonë është e sinqertë dhe e vazhdueshme”, ka deklaruar Abdixhiku.
Kreu i LDK-së ka theksuar gjithashtu se njohja e pavarësisë së Kosovës nga Ukraina do të ishte një hap historik dhe do të forconte marrëdhëniet bilaterale mes dy vendeve.
“Presim që Ukraina, si një shtet që vetë po lufton për të drejtën e saj për ekzistencë, të njohë pavarësinë e Republikës së Kosovës. Një gjest i tillë do të kishte peshë të madhe politike dhe simbolike për të dyja vendet”, është shprehur Abdixhiku.
Takimi mes Abdixhikut dhe Klitschkos vjen në një kohë kur solidariteti ndërkombëtar ndaj Ukrainës mbetet i rëndësishëm në përballje me agresionin rus, ndërsa Kosova vazhdon të kërkojë njohje të mëtejshme në arenën ndërkombëtare./TEL
