Në Bazel të Zvicrës vijojnë përgatitjet e fundit për festivalin evropian të këngës, që nis me natën e parë më 13 maj.
Shqipëria do të performojë e 12-ta dhe ka bërë tashmë provën e parë skenike. Emocionet janë të shumta nisur nga rankimi i lartë i këngës “Zjerm” në rrjetet sociale dhe në grupfanet e adhuruesve të Eurosong.
Dy protagonistët e “Shkodrës Elektronike” që do përfaqësojnë Shqipërinë sjellin për RTSH emocionet e javës së fundit. Kolë Laca dhe kantautorja Beatriçe Gjergji prej kohësh kanë zhvilluar ture në vende të ndryshme të Evropës dhe tregojnë se çfarë pëlqehet nga kënga shqiptare.
“Të huajve u ka ngjitur kjo këngë. U pëlqen fakti që ka një element etnik, tribal, që është çiftelia, por edhe ritmika. Me tarabuk është bërë, me tarabuk elektronik,” thotë artisti Laca.
“Janë fjalë të ndiera. Unë i ndiej ato fjalë. I kam zgjedhur nga shpirti im kur i kam shkruar. Është e pabesueshme për mua sot që të shoh njerëz, që nuk janë shqiptarë, duke kënduar ato vargje,” tregon kantautorja, Beatriçja.
“Zjerm” numëron afro 1 milion klikime në kanalin zyrtar të Eurosong në YouTube dhe renditet ndër këngët më të klikuara. Por cilat janë pritshmëritë e dy protagonistëve?
“Ne shohim që njerëzve u pëlqen kjo këngë. Funksionon me një fjalë. Mbas provës së parë sinqerisht na bënë komplimente tërë ata teknikë, ata që ishin aty,” shprehet z. Laca.
“… sinqeriteti, fati, momenti dhe ndoshta ndonjë ndihmë prej lart. Kam filluar ta besoj këtë gjë!” shton këngëtarja.
Dy protagonistët, fitues të Festivalit të Këngës në RTSH kanë prezantuar edhe veshjen e tyre skenike, një kombinim midis traditës dhe modernes. Kostumet janë krijuar nga stilistja njëherësh edhe e ëma e Beatriçes, Irina Dema në bashkëpunim me markën “Tamel Clothes”, duke reflektuar thelbin e identitetit modern shqiptar në një gjuhë universale artistike, njofton rtsh.
