Tetë kapituj të rinj të Grupimit të 3 për hapjen e negociatave janë miratuar nga Këshilli i Bashkimit Evropian.
Grupkapitulli i konkurrueshmërisë dhe rritjes gjithpërfshirëse, sipas BE-së, shënon një hap të rëndësishëm historik për Shqipërinë, në rrugëtimin e saj drejt Bashkimit Evropian.
Ky grupim përfaqëson rritjen gjithpërfshirëse për mirëqënie dhe përfshin tetë fusha: Kapitulli 10 (Transformimi Digjital dhe Media), Kapitulli 16 (Tatimet), Kapitulli 17 (Politika Ekonomike dhe Monetare), Kapitulli 19 (Politika Sociale dhe Punësimi), Kapitulli 20 (Ndërmarrjet dhe Politika Industriale), Kapitulli 25 (Shkenca dhe Kërkimi), Kapitulli 26 (Arsimi dhe Kultura), Kapitulli 29 (Bashkimi Doganor).
Pas vendimit të marrë ditën e djeshme (7 maj) në mbledhjen e Këshillit të Bashkimit Evropian, janë hapur në total në një periudhë 8 muajore negociatat për 27 fusha.
BE bëri me dije gjithashtu se më 22 maj në Bruksel, do të mbahet Konferenca e Pestë Ndërqeveritare midis Bashkimit Evropian dhe Shqipërisë.
Lajmi për hapjen e 8 kapitujve të rinj të Grupimit 3, njoftua edhe mëngjesin e sotëm nga kryeministri Edi Rama, ndërsa konfirmohet zyrtarisht edhe nga BE.
“Me këtë vendim janë hapur deri tani negociatat gjithsej për 27 fusha (kapituj dhe kritere) në vetëm tetë muaj, pas hapjes me sukses të Grupimit 1 (Themeloret) më 15 tetor 2024, Grupimit 6 (Marrëdhëniet me Jashtë) më 17 Dhjetor 2024, si dhe Grupimit 2 (Tregu i Brendshëm) më 14 Prill 2025. Ky ritëm i përshpejtuar i çeljes së negociatave reflekton si përkushtimin e Shqipërisë ndaj reformave, ashtu edhe theksin e ripërtërirë të BE-së mbi zgjerimin si një prioritet strategjik.
Përfundimi me sukses i këtyre negociatave pritet të sjellë përmirësime të prekshme në jetën e qytetarëve shqiptarë, si shërbime publike më të thjeshta dhe transparente, politika tatimore më të drejta të prirura për t’u bërë pjesë e tregut të vetëm të BE-së, mbrojtje më të forta për punëtorët dhe vende pune më të sigurta. Kjo krijon mundësi për bizneset shqiptare që të rriten dhe të përgatiten për të konkurruar për më shumë mundësi në tregjet evropiane, dhe në të njëjtën kohë të rrisë normat e rritjes së Shqipërisë duke e transformuar këtë rritje në më shumë mirëqenie dhe kushte më të mira jetese, ndërkohë që u jep të rinjve akses më të madh në arsimin, bursat, mundësitë e kërkimit dhe programet e trajnimit të BE-së”, thuhet në njoftimin e dhënë nga BE, njofton rtsh.
