Ka përfunduar takimi i presidentes Vjosa Osmani me katër liderët e partive politike.
Pas takimit me presidenten Vjosa Osmani, liderët e tri partive që në legjislaturën e kaluar ishin në opozitë – Memli Krasniqi (PDK), Lumir Abdixhiku (LDK) dhe Ramush Haradinaj (AAK) deklaruan para mediave se as ky takim nuk solli ndonjë zhvillim të ri. Ata theksuan se i kanë kërkuar liderit të Vetëvendosjes, Albin Kurti që të ndryshojë kandidatin për kryetar të Kuvendit të Kosovës, duke e konsideruar këtë si kusht të domosdoshëm për të ecur përpara në krijimin e institucioneve të reja. Kryetari i PDK-së, Memli Krasniqi, tha se “as pas këtij takimi nuk ka tym të bardhë”, duke nënkuptuar mungesën e ndonjë marrëveshjeje që do të zhbllokonte situatën në Kuvend.
Kryetari i LDK-së, Lumir Abdixhiku, u shpreh se takimi nuk kishte asnjë efekt konkret:
“Asnjë propozim, asnjë lëvizje nga dëshira partiake. U mblodhëm për gjëra që tashmë i dimë. Si i tillë, ky takim nuk pati kurrfarë kuptimi”, tha ai. Ndërkohë, kryetari i AAK-së, Ramush Haradinaj, theksoi nevojën për konsensus rreth një kandidati unifikues për kryetar të Kuvendit: “Për kryetar të Kuvendit duhet një person unifikues, në mënyrë që të kalojmë në etapën tjetër. Kuptohet, këtë mundësi e kemi diskutuar edhe me presidenten”, tha ai, njofton rtk.
