Mads Pedersen, çiklisti danez i Lidl foli pasi fitoi Etapën e Parë të “Giro d’Italia” 2025, e cila filloi në Durrës dhe përfundoi në Tiranë. Pedersen, 29-vjeçari nga Danimarka duke reflektuar mbi këtë sukses tha se është e mrekullueshme të veshësh fanellën rozë. ”Kjo është etapa ime e preferuar. Të marrësh fanellën rozë është diçka e mrekullueshme. Pas një bashkëpunimi kaq të fortë të ekipit, është fantastike që mund t’u kthej atyre gjithçka me një fitore”.
Giro d’Italia nis me emocione nga Shqipëria, Mads Pedersen fiton në Tiranë dhe vishet me fanellën rozë
Emocione të forta që në etapën e parë të Giro d’Italia, e cila u zhvillua në Shqipëri dhe përfundoi në Tiranë. Mads Pedersen ishte triumfues i etapës, duke kaluar vijën e finishit përpara Wout van Aert pas një sprinti spektakolar që konfirmoi pritshmëritë për dy favoritët kryesorë të ditës.
Pedersen përfitoi nga një punë e shkëlqyer ekipore e Lidl-Trek, veçanërisht gjatë 40 kilometrave të fundit, ku ndër të spikaturit ishte Giulio Ciccone, i cili vendosi ritmin dhe ndihmoi në përzgjedhjen e grupit kryesor. Në këtë etapë të parë u regjistruan edhe zhvillime të rëndësishme për pretendentët e renditjes së përgjithshme: Thymen Arensman dhe Derek Gee mbërritën me vonesë, duke humbur kontaktin me grupin kryesor, ndërsa Mikel Landa pësoi një rrëzim të rëndë që rrezikon pjesëmarrjen e tij në pjesën tjetër të garës.
Me këtë fitore, Pedersen jo vetëm që siguroi etapën, por gjithashtu veshi fanellën rozë, duke u bërë lideri i parë i këtij edicioni të Giro d’Italia./KJ
