Nga: Dashnim HEBIBI, Zürich
Për herë të dymbëdhjetë me radhë, Kuvendi i Kosovës nuk ka arritur të konstituohet. Seanca e paralajmëruar për në orën 10:00 nisi me vonesë, në orën 10:33, dhe zgjati vetëm katër minuta. Kryesuesi Avni Dehari njoftoi se mungesa e dakordimit për zgjedhjen e kryetarit dhe nënkryetarëve e detyroi shtyrjen e seancës për më 9 maj, në orën 10:00.
Subjektet politike – PDK, LDK, AAK dhe Lista Serbe – refuzuan të propozojnë emra për Komisionin Zgjedhor për zgjedhjen e kryetarit të Kuvendit. Këto parti kundërshtojnë mënyrën e votimit të propozuar nga Vetëvendosje, duke mos pranuar që ai të bëhet në mënyrë të fshehtë.
Në ndërkohë, partitë opozitare dhe shumica e deputetëve vazhdojnë të japin deklarata për media, pa një zgjidhje konkrete në horizont. Në sallën e Kuvendit, deputetët qëndrojnë vetëm pak minuta, ndërsa jashtë ka më shumë telashe me parkimin sesa me përmbajtjen e debatit politik.
Kjo situatë po konsiderohet si një ngërç i thellë politik dhe institucional. Disa prej liderëve opozitarë kanë dalë me propozime të ndryshme. LDK ka sugjeruar krijimin e një qeverie uniteti apo tranzicioni. AAK, përmes kryetarit Ramush Haradinaj, e mirëpret idenë e konsultimeve, por pa përfshirë Vetëvendosjen. Haradinaj thotë se preferon një qeveri të opozitës.
Nga ana tjetër, kryetari i PDK-së, Memli Krasniqi, akuzon LVV-në për bllokim të qëllimshëm:
“LVV po e mban peng shtetin dhe po abuzon me të drejtën kushtetuese për të propozuar kandidatin për kryetar të Kuvendit, pa pasur shumicën.”
Në këtë klimë të tensionuar politike, qytetarët, përfshirë ata në diasporë, presin me padurim një zgjidhje që do të mundësonte funksionalizimin e institucioneve dhe ecjen përpara të vendit.
Tani për tani, gjithçka është pezull dhe sytë janë te seanca e radhës më 9 maj.
SAM24.info
