Seanca konstituive e Kuvendit të Kosovës ka dështuar për herë të nëntë, duke e thelluar edhe më tej ngërçin institucional që ka pasuar zgjedhjet e 9 shkurtit.
Kryesuesi i seancës, deputeti i Lëvizjes Vetëvendosje, Avni Dehari, propozoi që zgjedhja e kryetarit të Kuvendit të bëhet përmes votimit të fshehtë, një nismë kjo që u kundërshtua ashpër nga të gjitha grupet parlamentare, përveç Vetëvendosjes.
Partitë opozitare – PDK, LDK dhe AAK – e cilësuan këtë propozim si shkelje të Kushtetutës dhe rregullores së punës së Kuvendit.
Kryetari i PDK-së, Memli Krasniqi, reagoi ashpër duke e quajtur këtë përpjekje “të paprecedentë” dhe “tendencë për të thelluar krizën politike”.
“Mos e ktheni Kuvendin në cirk. Kjo është fyerje për qytetarët. Nuk mund ta impononi kryetarin në mënyrë arbitrare e të kërkoni votim të fshehtë pasi nuk i keni votat publikisht,” tha Krasniqi, duke ngritur shqetësimin për “pazare të fshehta” dhe “precedentë anti-kushtetues”.
Në të njëjtën linjë, deputetja e LDK-së Hykmete Bajrami e cilësoi procedurën si “arbitrare dhe të paligjshme”, duke shtuar se partia e saj nuk do të bëhet pjesë e një shkeljeje të tillë.
Edhe përfaqësuesja e AAK-së, Time Kadrijaj, shprehu kundërshtimin e saj ndaj këtij propozimi, duke i bërë jehonë qëndrimeve të partive të tjera opozitare.
Përplasjet mes partive theksojnë se kriza për zgjedhjen e kryetarit të Kuvendit vazhdon, pa asnjë shenjë për një marrëveshje politike afatshkurtër, njofton rtsh.
