Ambasada Austriake në Tiranë, në bashkëpunim me Departamentin e Gjermanistikës dhe Bibliotekën Austriake në Universitetin e Shkodrës, organizoi në sallën “Walter Höflechner” një takim të veçantë letrar me shkrimtaren e njohur austriake Andrea Grill.
Aktiviteti u moderua nga lektorja austriake në Departamentin e Gjermanistikës, Mag.phil. Karoline Kuttner, e cila prezantoi romanin më të ri të autores, “Perfekte Menschen” (Njerëz të përsosur).
Andrea Grill ndau me studentët dhe nxënësit e gjuhës gjermane – por edhe me dashamirës të tjerë të letërsisë – përvojën e saj si autore, rrugëtimin në botën e shkrimit dhe procesin krijues të veprave të saj. Përmes një bashkëbisedimi të hapur dhe të gjallë, pjesëmarrësit patën mundësinë të diskutojnë mbi rëndësinë e letërsisë në shoqërinë bashkëkohore dhe të frymëzohen për të ndjekur ëndrrat dhe pasionet e tyre.
Gjatë takimit u prezantuan gjithashtu esetë e realizuara nga Andrea Grill në bashkëpunim me shkrimtaren Albana Shala. Esetë janë përfshirë në antologjinë “Të mbjellësh pemë në shkretëtirë. Në ç’botë duam të jetojmë në vitin 2040?”, ku trajtohet tematika e së ardhmes së dëshiruar.
Ky aktivitet pasuroi njohuritë kulturore të të rinjve tanë, duke i inkurajuar ata drejt krijimtarisë, leximit dhe përfshirjes në letërsinë bashkëkohore evropiane. Le të vazhdojmë të nxisim kulturën, dijen dhe krijimtarinë së bashku! /USH
#AndreaGrill#AlbanaShala#TakimLetërsie#Kulturë#Inspirim#Studentë#Nxënës#LetërsiBashkëkohore#UniversitetiShkodrës
